Ирээдүйн өөртөө илгээх захидал: Өөрийгөө эргэцүүлэхүйн үнэ цэн ба гайхамшиг

• "Миний давуу болон сул тал юу вэ?"
• "Миний бодол санаа, үйлдэлд юу хамгийн их нөлөөлж байна?"
• "Намайг юу хурцалж, урагшлуулдаг вэ?"

Бид бүгд гадны нөлөөллөөр тодорхойлогддог бөгөөд хүмүүс аливааг хэзээ ч яг ижилхэн өнцгөөс хардаггүй. Өөрийнхөө мэдрэмжийн учир шалтгааныг судалж, сэтгэл хөдлөлөө хэрхэн хүлээж авч байгаагаа ойлгох тусам хүний сэтгэл хөдлөлийн оюун ухаан (EQ) илүү өндөр түвшинд хөгжиж, өөрийгөө бүрэн дүүрэн илэрхийлэх чадвартай болдог.

2. Одоо байгаа зүйлсийнхээ үнэ цэнийг мэдрэх нь

Талархал бол аз жаргалд хүрэх хамгийн энгийн бөгөөд шалгарсан арга юм. Биднийг аз жаргалтай болгодог тэр л энгийн зүйлсийг анзаарч, талархах цаг гаргаснаар ямар ч ашиг тусгүй сөрөг мэдрэмж, хэрэгцээгүй нөхцөл байдлаас өөрийгөө чөлөөлж чаддаг. Өөрийнхөө талархаж явдаг 10 зүйлийг жагсаан бичээд хэдэн сарын дараах өөртөө илгээгээд үзээрэй. Энэ нь цаг хугацааны урсгалд Та ирээдүйн өөртөө "аз жаргалын тун" бэлэглэж буй хэрэг юм.

3. Уужуу ухаан ба эмпати чадвараа хөгжүүлэх нь

Хүчтэй сэтгэл хөдлөл, бухимдал дагуулсан нөхцөл байдлыг даван туулах нь хэцүү байдаг. Харин дүрэлзсэн сэтгэл хөдлөлийг эрүүл ухаан, логик дүгнэлтээс салгаж чадах нь амьдралын маш том ур чадвар юм. Яг одоо тулгарсан асуудлын талаар юу мэдэрч байгаагаа цаасан дээр буулгаад, хожим нь эргэн уншаарай. Цаг хугацаа өнгөрсний дараа Та тухайн нөхцөл байдлыг илүү тайван, саруул ухаанаар дэнслэх болно.

Ингэснээр Та тухайн асуудалд холбогдсон бусад хүмүүсийг илүү сайн ойлгож, эмпати буюу бусдыг ойлгох сэтгэлээ хөгжүүлэхийн зэрэгцээ, ирээдүйд ижил төстэй асуудал гарахад хэрхэн зөв хариу үйлдэл үзүүлэхээ мэддэг болно.

4. Өөртэйгөө тогтоох хамгийн нандин харилцааг бүтээх нь

Бидний амьдралын туршид бүтээдэг хамгийн чухал харилцаа бол бусадтай бус, харин өөртэйгөө тогтоосон харилцаа юм. Ирээдүйдээ захидал бичих нь дотоод дуу хоолойгоо сонсож, өөртэйгөө ярилцах шилдэг арга болдог. Өөрийнхөө ямар амжилтаар бахархаж байгаагаа, засаж залруулахыг хүссэн ямар зан чанар байгаагаа, ямар шинэ дадал зуршилтай болохыг (эсвэл ямар муу зуршлыг хаяхыг) хүсэж байгаагаа илэн далангүй бичээрэй.

Хамгийн чухал нь, захидлынхаа төгсгөлд өөртөө урам зориг, хайр халамжийг илгээхээ мартуузай. Энэ л бид бүгдэд хамгийн их хэрэгтэй байдаг дотоод эрчим хүч, урам зориг юм.